Aiako Harrietako zazpi gailurrak Kanal Zuzenetik igota

Ibilbidearen track-a Wikilock-en

Oraingoan, aitak antolatzen du Oargi mendi taldearen irteera. Nik aspaldi aipatu nion Bocaminako igoera oinarritzat hartuz, Aiako Harrietako Kanal Zuzena igotzea erabaki zuen.

Urdinez, Bocaminako Kanala eta bere bariateak.
Horiz, Kanal Zuzena eta bere barianteak.

Ez gara goiz esnatzen, eta nire gorputzak eskertzen du. Bart, sagardotegia izan genuen eta goizeko bostak aldera sartu nintzen ohera. 16 mendizaleko taldea Arditurriko meategietan elkartu eta gorantz atera ginen.

Igoera, blogeko beste sarrera batean ere azalduta dago: Meategietan barrena Unailekura igoko gara, eta gero SLa erabiliz, Aiako Harriak mendebaldetik inguratzen duen GRra iritsiko gara. Behin helduta, hegoaldera jarraituko dugu 10 bat minutuz.

GRa jarraituz azken urratsetan.

GR-a uzteko, ibaiaren harrietatik gora egingo dugu, eta laster Bocaminako kanaletik igotzen den bidearekin aurkituko gara.

Azkenaldian euria bota du Euskadin, baina nahiz eta bustita egon, mendiko botek gogoz heltzen diote bidean aurkituko dugun harri granitiko zaharrari.

Espoloi beltzari begira, eskuinera.

Kanala bitan banatzen zaigu, eta gaurkoan eskuineko bidea hartuko dugu Kanal Zuzenetik igotzeko. Gogoratu dezagun, ezkerrerantz jo ezkero, Bocaminako Kanaletik igoko ginatekela gora, zailtasun gutxiago duen bidetik.

Espoloi beltza orindik gertuago.

Ibilbidea ez da zaila, baina belarrak eskuekin heltzeko beharra ikusiko dugu behin baino gehiagotan. Gora heltzen garen heinean, beherako bistak bertigo arazoak eman diezaguke, horretarako ahultasuna badugu.

Taldea gora, zuzen-zuzen.

Kanalaren goi aldera iristean, irtetzeko hiru aukera desberdin izango ditugu. Zuzenena, dena ezkerretik zuzen igotzen da. Errazena, eskuinerantz zuzentzen da kanala estutzen den momentuan. Gero, tartean dagoen aukera bat izango dugu ere. Zailtasuna ere, tartekoa.

Ezkerrean horiz, irteera zuzenena, eta zailena. Eskuinean laranjaz, tarteko zailtasuna duena.

Zuzen zuzena hartu ezkero, “anilla”ko pasora iritxiko gara.

Hemendik, eskuinerantz jo genuen, Lizarretako gaina eta Erroilbide egitera. Eta gero gure oinatzetatik itzuli Txurrumurru, Hirumugarrieta, Putzuetako gaina eta Muganix igotzeko.

Talde argazkia.

Hemendik berriro hego-mendebaldera joko dugu ezkutuan dagoen Errekarte Harrira igotzeko. Bidea ez da erosoa, baina mugarriak edo “hito”ak jarraituz azkenean, iritsiko gara. Hasieran pinu handi dun malda batetik jaitsiko gara. Poliki-poliki eskuinerantz biratzen joango gara maldatik atera eta haitzen artean sartzeko. Hertzera iristean, urrutira ikusiko dugu gailurreko postontzia. Sasi artetik jarraituz, iritsiko gara azkenik eguneko gailurrera.

Jaisteko, iparralderantz zuzenduko gara, Elurretxerantz doan bidea jarraituz, beti iparraldera. Basoa iluntzen denean eta ezkerrerako malda lasaitzen denean, nahi izan ezkero zuzen jaitsi gaitezke GRa topatu harte.

Behin GRan, hegoalderantz zuzenduko gara Unailekura eta Meategietara jaisten den SLa topatu arte, ta handik, kotxera.

Aukeran, Arditurriko meategiren batera sartu gaitezke. Barnean kolore anizdun harriak ikusiko ditugu, ta baita antzinako burdinbide herdoilduak. Oro har, edertasun beteko lekua da hau.