Donostia
– Ulia – Pasaia – Jaizkibel – Hondarribi – Irun – Erlaitz
– Aiako Harriak – Bianditz – Listorreta – Txritokieta –
Garbera – Donosti
Gutxi
gora-behera hilabete barru, Hiru Haundiak
mendi martxa ospatuko da. Gorbea, Anboto eta Aizkorri mendiak
elkartzen dituen 100km-ko bidea da. Aurtengo ediziora apuntatuta nago,
eta hau prestatzeko intentzioarekin, Donosti inguruan 70 bat
kilometroko ibilbide hau planifikatu dut. Gauean ibiltzen ohitzen
joateko, ostiral arratsaldean aterako naiz Donostiatik bertatik,
lanaldiaren ostean.
 |
| Ibilbidearen laburpena |
Track en Wikiloc
1. zatia: Donostia – Ulia – Jaizkibel – Irun
- Zailtasuna:
Erraza baina luzea
Lana
amaituta, Donostitik atera naiz (0m; 17:10) Ulia gailurraren bila.
Azkar batean heldu naiz (222m; 17:44), milaka aldiz errepikatutako
bidetik, eta soilik argazkirako denbora galduta Mendiolaruntz
zuzendu naiz. Ormigoizko pista igaro eta maldan gora zuzen
jarraituta, 18:09tan iritsi naiz Almirante gotorlekura (209m).
Hemendik pasa ginen ere Donostiako gotorlekuak igaro genituenean.
 |
Jaizkibel Almiranteko gotorlekutik
|
Maldan
behera jaitsi naiz, oso inklinatua den malda batetik, San Pedroko
hilerritik pasatzen den hori, eta Donibanerekin komunikatzen gaituen
txalupara iritsi naiz (0m; 18:30). Hemen denbora dexente egon naiz ilaran geldirik, COVIDagatik txaluparen aforoa murriztu baitute.
Behin beste aldera iritsi naizela, txutxe-denda batera sartu naiz
filipino
eta kitkat
batzuk erostera. Eguerdiko ordubitan bazkaldu dut eta onezkero gosea
sartu zait.
Portuko
sarrerako farorantz zuzendu naiz orain, Kalaburtza kalan eskuinera
igotzen den zementuzko pista zabala hartzeko. Gora egingo
dugu, desbiderapenik gabe, Jaizkibeleko errepidera heldu arte. Hemen
ere, aurrera egingo dugu errepidetik, bigarren pinudi batera iritsi arte. Hemen, eskuinera eta gora bidexka
bat ateratzen da, diagonalean eta era oso erosoan Menditxikira
eramango gaituena (336m; 19:36). Beti altuen doan bidea jarraituta,
bost minututan Jaizkibeleko bigarren dorrera iritsiko gara eta 10
minutu geroago, hirugarren dorrera. Gorantz zuzenduko gara hemen ere,
Jazkibel gailurraren ondoan kokatutako antenetarantz. Hauek ezkerreko
errepidetik inguratu eta hesia amaitzean eskuinera gora egingo dugu
gailurra lortzeko (545m; 20:10). Ilunabarra hasi da, modan jarri den
Golden
Hour-ean
gaude orain, eguzkiaren koloreak dena gorritzen baitu. Hemendik
Hondarribira iritsi arte, ia dena aldapa behera izango da.
 |
Jaizkibel gailurra
|
Laugarren
dorrea (edo Santa Barbarako dorrea) 15 minututan zeharkatuko dugu eta
bostgarrena 15 minutu gehiagotan (Erramutz mendia (386m; 20:40)).
Atsaldeko 20:50etan Guadalupeko gotorlekuaren ondotik pasako gara.
Hemen, Hondarribira zuzenean jaitsi ordez, denboraz ondo noanez,
kostaldera jaistea erabaki dut, Higer Lurmuturretik igarotzeko.
Kanpinera bertara gaueko 21:30etan iritsiko naiz. Honezkero gaua da,
eta linterna piztuko dut, Hondarribira doan errepidean inork
harrapatu ez nadin. Behin portuan, trote zikinarekin hasiko naiz,
ahal bezain azkar Iruneko BBB garagardotegira iritsi ahal izateko.
Hondarribiko gotorlekua gaueko hamarretan igaroko dut, eta BBBra 30
minuturen ondoren iritsi naiz. Hemen, lagun batekin batera, afari galanta hartu
dut: hanburgesa ta kaña bat. Energiak berpiztu behar dira 30
kilometro eta 5 ordu t’erdi igaro ondoren.
 |
Ilunabarra Jaizkibelen
|
2. zatia: Irun – Erlaitz – Aiako Harriak – Bianditz – Listorreta
– Txoritokieta – Donostia
- Zailtasuna:
Ertaina Aiako Harriengatik eta oso luzea
Gaueko
hamaiketan, lekua utzi eta Erlaitz mendirantz abiatu naiz
Eguzkitzaldea kaletik gora. Herri barrutik mugitzeko, trote cochinero
erabiltzen dut, oinez luzeegia izango baita. Inguruak ez ditut
ezagutzen, baina mugikorraren GPSaren eta linternaren laguntzaz, gora
noa ia galdu gabe. Gaua guztiz sartua dago Erlaitz gailurrera iristen
naizenerako (497m; 00:56). Handik Irun, Hondarribi eta Hendaian
dir-dir egiten duten argi ñimiño guztiek, ikuskizun paregabea
eskaintzen digute. Maizago igo beharko ginateke mendira gauetan.
 |
Hondarribi, Irun eta Hendaia
|
Gailurra
utzi eta errepidean gora egingo dugu Elurretxerako zentzuan.
Noizbehinka errepidez, besteetan GR121a edo GR285a jarraituta
poliki-poliki desnibela irabazten goaz Muganix mendiaren magalera
iristen garen arte. Hemen, Aireko Palazioaren inguruko bideetatik
gora egingo dugu lehen bunkerrera iritsi arte. Gero bide normala
jarraituko dugu Muganitx gailurreraino (758m; 02:04). Pixkat
aurrerago dagoen iturrian ur pixkatxo bat edan eta Hirumugarrieta
gailurrera abiatuko gara. Gauean Aiako Harrietatik ibiltzea dirudiena
baino konplikatuagoa da. Granito zahar bustia eta lur beltzak nahastu eta irristatu egiten gaitu. Hirumugarrietara iritsi (811m; 02:23) eta
haman minututa Txurrumurru egitea lortuko dut (828m). Gailurrean, bikote
bat aurkitu dut lotan. Egiten duen haizearekin eta nire linternaren
argiarekin, esna ez egotea harritzen nau. Anillako bidea pasata,
Erroilbide gaindituko dugu hamabost minuturen buruan (837m; 02:48).
Hemendik behera egingo dugu Oiartzun aldera Aritxulegiko lepora doan
bidea jarraituz. Batzuetan oinez, besteetan korrika maldan behera noa
ziztu bizian goizeko 03:30etan Aritxulegiko lepora iristen naizen
arte.
 |
| Hirumugarrieta |
Aritxulegin
iturria dago, beraz geldialdia lasaitasunarekin hartzen dut. Camelback
betetzen dut eta bizkarrean daramazkidan fruitu lehorrei indusketa galanta egiten diet, gorako malda latza baitut aurretik. Denbora gehiago utzi gabe, gorantz
zuzentzen naiz Bianditz-era doan pista zabaletik. Errenagako lepoan,
pista utzi eta bidetik jarraituko dugu aldapa gora. Lainoa sartzen
hasi da eta gauarekin nahastuta, ikuspena asko murriztu zait.
Punturik altuenera iristean, ezkerrera hartuko dugu Bianditz
gailurrera igotzeko (840m; 04:33), Erroilbide baino 3 metro altuagoa.
Egindako
bidetik atzera egingo dugu lehen aipatutako puntu altuenera iritsi
arte eta zuzen jarraituko dugu belarditik behera. Airean dagoen
hezetasuna lurreko belar hotza ikutzean, kondentsatu egiten da ur
tanta eran, tanta horiek nire zapatilekin jasotzen ari naiz
poliki-poliki galtzerdiak ere bustitzen zaizkidan arte. Errepidea alde
batera utziz, behera jarraituko dugu ahal den zuzenen, aurretik
ditugun gailur guztiak egiteko intentzioarekin. Horrela Masuketa
(795m; 04:51), Munagirre (781m; 05:15) eta Zaria (625m; 05:45) egiten ditut.
 |
| Munagirre |
Azken
gailurrean, Bianditzetik jarraitzen egon garen mendikatea amatitu
egiten da eta iparraldera jo behar dugu aurrera jarraitzeko. Bidea
basoan sartzen denean, ezkerrera hartuko dugu, bai GRtik edo bestela,
pixkat aurrerago maldan behera ateratzen den bidexka batetik. Bi
bideek, lehenengoak buelta handiagoa emanda eta bigarrenak azkarrago
Irubietako lepora jaitsiko gaituzte. Lepotik igarotzen den pistatik
aurrera egingo dugu Ezkitako Kaxkua mendia eskuin aldera utzita eta
Ezpalaurri lepoa pasata eta bost minutura eskuinera oso zuzen igotzen
den bidexka bat hartuko dugu Pertsebel mendira igotzeko. Bidea zearo
itxita dago sasi, oti eta garoekin, baina azkenik gailurra egitea lortzen
dut (529m; 07:00). Hemendik azkar iritsiko gara Aldura mendira
(544m; 07:10). Gailurrean argazkia ateratzen nagoela, eguzkia
agurtzera ateratzen zait ortzi-mugan. Eguneko lehen izpiak berotu eta
motibatu egiten naute, 10 orduz ilunpetan ibili ondoren, izugarri
eskertzen da argia eta beroa.
 |
| Alduratik egunsentia |
Gailurretik
mendebaldera joko dugu lehengo eta gero hegoaldera oso malkartsua den
malda batetik behera jaisteko. Han eskuinera doan bidea jarraituko
dugu eta hurrengo bidegurutzean, berriro eskuinera joko dugu malda
behera zorrotzetik Susperregi jatetxera iritsi arte. Hemendik,
errepidea jarraituko dugu, zuzenago jaitsiko gaituzten bidezidorrak
aurkitu arte eta uste baino lehenago Listorretara iritsiko gara
(07:41). Donejakue bidea jarraituz errepidearen zati handi bat
kenduko dugu Perurenako lepora bidean. Hemendik, eguneko azken malda
potoloena igotzen hasiko gara. Lehendabizi, errepidea dena, gero
pista bihurtzen da azkenik bidexka izateko. Hemen, ezkerrera joko
dugu Txoritokieta gailurrera eramango gaituen bidea hartzeko.
Gailurrera igo (317m; 08:31) eta dena errepidetik behera egingo dugu.
Errepideak berriro gora egin baino lehen, ezkerrera ateratzen den bidea
hartuko dugu maldan behera jaisteko, eta hau izango da egunean
zapalduko dugun azken bidexka. Hemendik aurrera, dena asfaltatuta
egongo da. Abiadurarako hobea baina belaunentzako okerragoa den
errepidetik jarraituko dugu Altzaruntz. Behin Lauaizeta Jatetxera
iristean, zuzen jarraituko dugu Garberaruntz. Garbera, atzeko
bidegorritik igaroko dugu eta aurrera jarraituz Ametzagaina parkearen
sarrerara iritsiko gara, eta hemendik etxera (09:34).
 |
| Txoritokieta |
10
ordu gauez eta 6 egunez ibili naiz 70 kilometroren buruan. Inguruko
paisaiak eta lekuak hobeto ezagutzeko ahalbidetu didan bide
honetatik. Seguraski errepikatuko ez dudan ibilbide honetan denetik
izan da: Pasaiako txalupa, gotorlekuen ibilbidea, ilunabarra, afari
galanta, gaueko argiak, haize bortitza, laino itxia eta egunsentia.
Iruzkinak
Argitaratu iruzkina